ايام سودا.. بس انت تقدر

ايام سودا... بس انت تقدر


- قالوا الدنيا صعبة و ما فيها شىء يسر
مليانة تعب و آلام و وحدة و حزن و مر
موسى يطلع فرعون و الخير بيطلع شر
و الانسان محبوس فى حزنه و ناسى انه حر

- رديت و قلت متخافش انت مش وحيد محبوس
تقدر تخطى احزانك و كمان عليها تدوس
تقدر تعيش بالرجا و الامل يكون محسوس

- لما تعود عينيك تشوف الدنيا بحب
ف بسمة رضيع محمول برقة بين كفوف الاب
ف لمسة تحدى لشاب امام حلمه و هدفه الصعب
ف رجولة الجندى الجريح لما تشد الحرب
ف عيون مؤمن بسيط بيركع بخشوع للرب

- و ف شمس سخنة تبدأ تميل وقت الاصيل
و ف نظرة العاشق الولهان لما يعمل تقيل
و ف ريشة طايرة بفرحة فى الهوا العليل

- و ف كلمتين ناعمين يتقالوا بين حببين
و ف سما صافية بعد مطرة بقالها يومين
او دمعة بريئة وقت ضيقة نازلة بوضوح م العين

- و ف فرحة الوجود بالمولود لما يبدأ يدوس ع الأرض
و ف كبرياء الفلاح ف دفاعه عن الشرف و العرض
و ف بهجة اللى كان مستنى لما يجيلوا الرد

- و ف ينبوع ميه بارد على حلق ناشف فى ساعة حر
و ف وقفة الانسان ويا صاحبه فى يوم الشر

- و ف صورة حلوة لاصحابك فى رحلة او فى طريق
و ف موقف ولا كلمة تفكرك بأغلى صديق

- و ف غنوة ولا نكتة تضحك فى ايام مليانة شدة
و ف بوسة ع الخد م الحفيد للأم ولا الجدة

- و ف آية حلوة سمعتها أو قريتها ف انجيل
و ف مصر بلدك لما فى هواها تميل

- و ف نيل جميل ميته مفروشة بساط
و ف نظرة متفائلة بسيطة تقتل اليأس و الاحباط

- و ف حق ضايع لما بنصرة و قوة يعود
و ف دقة الفنان ساعة صفا ع العود

- و اى شىء حواليك ممكن تشوفه العين
يحوله احساسك الدافى بسمة بين شفتين

- الدنيا حلوة للى يشوفها بحب
بهجة و فرحة تحس و بالسلام فى القلب

- و لو لسة فى قلبك الحزن العميق احساس
العيب فيك يا صاحبى و لا تلوم الناس


*************
القاهرة – شتاء 2006

.

.

.

.

.